Alenemedbarn.no Reiser til utlandet

Feriereiser til utlandet
Ein forelder som har foreldreansvar saman med ein annan (felles foreldreansvar), eller som har foreldreansvaret åleine, kan ta barnet med på kortare reiser til utlandet utan samtykke frå den andre av foreldra.

Dersom det er usikkert om barnet kjem tilbake, kan domstolen leggje ned utreiseforbod. Ein forelder utan foreldreansvar må ha samtykke frå den som har foreldreansvaret for å kunne ta barnet med til utlandet. Domstolen kan likevel gi løyve til utanlandsreisa dersom det er openbert at barnet kjem tilbake.

Flytting til utlandet
Har foreldra felles foreldreansvar, må dei vere samde om det dersom barnet skal flytte utanlands. Har den eine foreldreansvaret åleine, kan den andre ikkje motsetje seg at barnet flyttar ut av landet.

Er det tvist mellom foreldra om foreldreansvaret eller om kvar barnet skal bu fast, kan ikkje barnet flytte ut av landet før tvisten er avgjord.

Utferding av pass til born
Har foreldra felles foreldreansvar, må begge skrive under på søknaden om pass når barnet er under 18 år.

I tilfelle der ein av foreldra har rett til å ta barnet med til utlandet etter føresegnene i barnelova, kan politiet likevel utferde pass til born med samtykke berre frå den eine av foreldra. Det kan gjerast sjølv om den andre av foreldra ikkje samtykkjer.

Bortføring av born
Når forhold/ekteskap der mor og far har tilknyting til meir enn eitt land, blir oppløyste, kan det av og til bli usemje mellom foreldra om kvar dei felles borna skal bu.

I somme tilfelle fører denne usemja til ulovleg bortføring til eller ulovleg tilbakehalding i eit anna land, og/eller det kan vere at barnet blir nekta kontakt med den andre av foreldra.

Noreg har slutta seg til to konvensjonar på dette området, Europarådkonvensjonen og Haagkonvensjonen. Justisdepartementet er sentral styresmakt etter desse konvensjonane. Dersom eit barn er bortført til eit land som ikkje har underteikna nokon av desse konvensjonane, må ei tilbakeføring skje etter dei rettsreglane som gjeld i vedkomande land. Hjelp frå norske styresmakter si side må i så fall ytast gjennom Utanriksdepartementet.

Kilde: BLD

Layout og foto Kari Reine. Nettsidene lages og vedlikeholdes av Kari Reine

Kontaktinfo: post@alenemedbarn.no

Annonser